Шупашкарта вырнаҫнӑ «Агромаш» завод Китай лицензийӗпе трактор кӑларма пуҫлӗ.
Коммуналлӑ урамра вырнаҫнӑ асӑннӑ предприятире иртнӗ эрнере Олег Николаев Элтепер пулнӑ. Предприятин гендиректорӗ Алексей Яковлев пӗлтернӗ тӑрӑх, Китайра ял хуҫалӑх техникине туса кӑларакан производительпе пӗлтӗр килӗшӳ тунӑ. Ҫавна май Чӑваш Енри завод «Агромаш-Lovol TD904» туса кӑларма пуҫласшӑн. Малтанласа машина комплекчӗсене пухасшӑн, кайран пӗтӗмпех кунта туса кӑларасшӑн.
Чӑваш Енре шӑпӑрлансене пӗчӗкрен ҫӗр ӗҫне хӑнӑхтараҫҫӗ. Ку вӑл ахальтен мар ӗнтӗ.
Лаша пуласси тихаран паллӑ, ҫын пуласси ачаран тесе каланӑ ваттисем.
Чӑваш Енре ачасене ял пурнӑҫне тата ял хуҫалӑхӗнчи ӗҫе юратма хӑнӑхтарас тесе ача пахчисенче агролабораторисем уҫнӑ. Паянхи куна ун пекки 137 ача пахчинче пур.
Проекта 146 аграри предприятийӗ, кооперативсемпе фермерсем хутшӑнаҫҫӗ.
Аграри лабораторийӗсем Ҫӗрпӳ тӑрӑхӗнче – 19, Муркаш тӑрӑхӗнче — 12, Шупашкар тӑрӑхӗнче – 10.
Шупашкар районӗнчи «Чурачикское» акционерсен обществи асӑннӑ муниципалитетри пысӑк ял хуҫалӑх предприятийӗсенчен пӗри. Халӗ унта 510 пуҫ пӑру вырнаҫмалӑх тепӗр корпус уҫнӑ. Ҫӗнӗ инвестици проектне хуҫалӑх 80 миллион тенкӗ укҫа хывнӑ.
Ӳлӗмрен выльӑх-чӗрлӗх комплексне тата анлӑлатасшӑн-пысӑклатасшӑн. Тепӗр 750 пуҫлӑх вите тума пуҫланӑ, пуррисене вара юсаса ҫӗнетеҫҫӗ. Унсӑр пуҫне 1000-шер ӗне вырнаҫмалӑх тепӗр икӗ корпус хута яма ӗмӗтленеҫҫӗ.
Хуҫалӑхра республика Элтеперӗ Олег Николаев пулса курнӑ.
Чӑваш Енре чи лайӑх пахчаҫӑна суйланӑ. Ку ята Екатерина Аввакумова тивӗҫнӗ. Вӑл — агроном, пахчаҫӑ, Ҫӗнӗ Шупашкарти теплица комплексӗнче ӗҫлет.
Вӑл «Профессире чи лайӑххи» Пӗтӗм Раҫҫейри конкурсӑн регионти тапхӑрӗнче ҫӗнтернӗ. Иккӗмӗшпе виҫҫӗмӗш вырӑнсене Дмитрий Кабаковпа Валерий Григорьев йышӑннӑ. Вӗсем конкурсра тӗрлӗ культурӑн вӑррисене уйӑрнӑ, вӗсене мӗнле акмалли пирки каласа кӑтартнӑ. Кунсӑр пуҫне салат калчисене хак панӑ.
Екатерина республика чысне Раҫҫей шайӗнчи конкурсра хӳтӗлеме кайӗ. Конкурс Вологда облаҫӗнче иртӗ.
Ҫӗрпӳ районӗнчи Туҫи ялӗнчи И.Н. Ульянов ячӗллӗ ял хуҫалӑх кооперативӗнче рабочи склад тӑрринчен персе аннӑ.
Ҫу уйӑхӗн 27-мӗшӗнче арҫын склад ҫивиттине сӳтнӗ. Инкек ҫавӑн чухне пулса иртнӗ. 1,8 метр ҫӳллӗшӗнчен ӳксен арҫын суранланса пӗтнӗ тата шӑммине хуҫнӑ.
Тӗпчевҫӗсем палӑртнӑ тӑрӑх, инкек предприятире ӗс хӑрушсӑрлӑхӗн правилине пӑхӑнмаран сиксе тухнӑ. Арҫыннӑн ятарласа ҫыхӑнмалли хатӗр те пулман.
Пӑтӑрмах тӗлӗшпе РФ Пуҫиле кодексӗн 143-мӗш статйин 1-мӗш пайӗпе пуҫиле ӗс пуҫарнӑ.
Чӑваш Енре ӗнер Ҫӗрпӳ округӗнче «Уй кунӗ» курав уҫӑлнӑ. Ӑслӑлӑхпа тӗпчев институчӗн аграри секторӗн территорине Раҫҫейри 15 регионти 69 предприяти пухӑннӑ. Вӗсен йышӗнчен 28-шӗ – техникӑпа тата ӳсен-тӑрана хӳтӗлемелли хатӗрсемпе тивӗҫтерекеннисем.
Ҫӗнӗлӗхсенчен пӗри – урапаллӑ «Агромаш-Lovol 904» трактор. Ӑна Шупашкарти «Агромаш» предприяти туса кӑларнӑ. Унпа ял хуҫалӑхӗнчи йывӑр ӗҫсене пурнӑҫлама пулать.
Паян курав малалла пырать.
Чӑваш Енри аграрисене ҫӗнӗ пулӑшу кӳме йышӑннӑ. «Контактра» халӑх тетелӗнчи «Чувашская Республика» (чӑв. Чӑваш Республики) пабликра пӗлтернӗ тӑрӑх, республикӑра «Чувашский хмель» (чӑв. Чӑваш хӑмли) ҫӗнӗ грант пурнӑҫа кӗме тытӑнӗ.
Укҫана хӑмла шалчине вырнаҫтарма тата юсаса ҫӗнетме кирлӗ материалсене туянма усӑ курма юрӗ. Анчах проекта грантпа уса кураканӑн хӑйӗн укҫине 20 процентран кая мар хывмалла.
Заявкӑсене Патшалӑхӑн финанс пулӑшӑвне паракан порталта ҫурла уйӑхӗн 2-мӗшӗччен йышӑнаҫҫӗ.
Шупашкарта ку уйӑхӑра «Пехет» агромаркет уҫӑлӗ. Вӑл «Каскад» суту-илӳ центрӗн цоколь хутӗнче пулӗ. Унта общество апатланӑвӗн 4 вырӑнӗ, 8 павильон, 76 фермер вырӑнӗ тата вырӑнти производительсем валли 12 яхӑн зона пулӗҫ.
Агромаркет уҫас шухӑш 2021 ҫултах ҫуралнӑ. Ӑна уҫма темиҫе хутчен те хӑтланнӑ, анчах каярах вӑхӑта куҫарса пынӑ. Хальхинче вара чӑнах та уҫӑлассине ҫирӗплетсе калаҫҫӗ.
Чӑваш Ен премьерӗ пӗлтернӗ тӑрӑх, тӗп строительство ӗҫӗсем вӗҫленнӗ.
Чӑваш Енре хатӗр апат фабрики пулӗ
Ку хыпара эпир Чӑваш Енен влаҫ органӗсен официалла порталӗнче хыпарлани тӑрӑх пӗлтӗмӗр. Шупашкар районӗнче пахча-ҫимӗҫ тирпейлекен цех туса пӗтернӗ. Ҫӗнӗ производствӑна унти «Агрофуд» тулли мар яваплӑ общество уҫнӑ.
Производство 1500 тӑваткал метр лаптӑк йышӑнать. Унта сехетре 2 тоннӑна яхӑн ҫӗрулми, кишӗр, хӗрлӗ кӑшман, сухан, ыхра тата купӑста тирпейлеме пултарӗҫ.
«Ку цеха уҫни «Хатӗр апат фабрики» мегапроекта пурнӑҫлассин пӗр пайӗ темелле. Ӑна 2030 ҫулччен пурнӑслама йышӑннӑ «Агропродвижение» стратегире пӑхса хӑварнӑ», – тенӗ объекта уҫма хутшӑннӑ чух республикӑн Правительствин Председателӗ Сергей Артамонов.
«Агрофуд» общество ертӳҫи Сергей Анучин пӗлтернӗ тӑрӑх, предприятие ҫуса тасатмалли, типӗтмелли, турамалли тата хутаҫа тултармалли хальхи вӑхӑтри оборудованипе тивӗҫтернӗ. Ҫавна туянма 15 миллион тенкӗ ытла укҫа хывнӑ. Цехра вунна яхӑн ҫын ӗҫлӗ.
Йӗпреҫ районӗнчи Пучинкере типӗтнӗ сӗт туса кӑларма тытӑнӗҫ. Ҫӗнӗ производствӑна унти «Волжское перерабатывающее предприятие» (чӑв. Атӑлҫи тирпейлекен предприяти) заводра хута янӑ.
Асӑннӑ завода темиҫе ҫул каялла уҫнӑ. Вӑл ӑнӑҫлӑ ӗҫлет, хальхи вӑхӑтра кирлӗ продукци туса кӑларать.
Ҫӗнӗ цеха уҫма республика Элтеперӗ Олег Николаев та пырса ҫитнӗ, предприятие ырласа сӑмах каланӑ.
Предприятири ҫӗнӗ комплекс талӑкра 100 тонна типӗтнӗ сӗт туса кӑларайӗ.
+8.3 °C